ستنا ام ابراهيم

لا تستغربوا سادتي من هذا الموضوع ولكن الفقير ككثير ممن شاهدوا هذه المراه اعتبرها من اولياء مصر
بيوت الفقراء فى مصر فى أيامنا هذه جحور لابيوت، هى الصورة المقابلة تمامًا لقصور الأغنياء المبالغ فى رفاهيتها إلى حد الفحش والكفر بنعمة الله. فى هذه البيوت الفقيرة كل المشاكل تجمعت، وكل الأمراض، وكل مظاهر القهر والحرمان. لذلك عندما نزل المذيع عمرو الليثى إليها بكاميرات التليفزيون فى برنامج "واحد من الناس" قوبل بسيل من المطالب الملحة والعاجلة.. وبينما هو يتنقل من جحر إلى جحر وصل إلى حجرة أم إبراهيم التى أجرى معها حوارًا لم يزد عن دقائق قليلة تحول فيها المذيع الشهير إلى طالبٍ مُحتاج، وأم إبراهيم إلى من يُطلب منها ويُحتاج إليها.
دقائق قليلة عادت فيها الدنيا إلى حجمها الحقيقى، وعظمت الآخرة، وعظم فى القلوب أمر أم إبراهيم التى ندين لهذا البرنامج الشىء الكثير أن أرانا بأعييننا واحدة من أولياء الله فى زماننا هذا، وجعلنا نسمع كلامها وننال من بركة دعائها.
بعد إذاعة تلك الحلقة تبرع واحد من فاعلى الخير بشقة لها، لكنها ماتت قبل أن تتسلمها، وما حاجتها إلى الشقة وقد جعل الله غناها فى قلبها.
لا أريد أن أطيل الحديث أكثر من ذلك، وإنما أنقل إليك الحوار الذى دار بينها وبين المذيع كما هو بلا زيادة ولا نقصان، وباللغة العامية التى دار بها..
المذيع: ألف سلامة عليكى.
أم إبراهيم: إنشالله تسلم من كل رَدى يابنى.
هو: إزى صحتك؟
- إنشالله تسلم من كل حاجة..
هو: إيه سلامتك، مالك؟
- تعبانة شوية بس.
هو: إيه مالك عندك إيه؟
- شوية بس كدة.. شوية كدة.
هو: إشتكليى.. مش أنا زى إبنك قولى لى مالك؟
- نعم؟
هو: مالك، سلمتك، عندك إيه؟
- إنشالله تسلم من كل رَدى، مفيش حاجة، بس جسمى بيوجعنى شوية كده.
هو: وفقدتى بصرك من قد إليه؟
- نعم؟
هو: فقدتى نظرك من قد إيه؟
- عينيا بتوجعنى على طول من زمان.. من زمان نظرى بيوجعنى.. من زمان أوى.. من زمان.
هو: حد بيخدمك؟
- نعم..؟
هو:حد بيجيلك؟
- حد بيجينى؟.. ما أنا معايا أربع بنات متجوزين فى مصر.
هو: طيب مين بيخدمك هنا؟
- متجوزين فى مصر غلابه.. رجَّالتهم بعيد عنك ميتة اتنين رجالتهم ميته واثنين.. واثنين.. تعبانين برضة.. والواد دِه، جمال، جمال دِه، جمال ده إبنى..
هو: بيخدمك جمال؟ بيقعد معاكى؟ بيخدمك؟
- هه؟
هو: بيخدمك؟
- ربنا موجود.
هو: طيب إنتى بتتعالجى، فىه دكاترة شافوكى ولاّ حاجة؟
- هه؟
هو: فىه دكاترة شافوكى؟
- أنا.. ربنا سبحانه وتعالى بِيِحدِفلى شوية العيا وبيشيلهم.. بيحدفهم ويشيلهم على طول.. يعنى ربنا سبحانه وتعالى معايا، ربنا معايا.. يعنى ربنا سبحانه وتعالى معايا، ربنا معايا، مفيش حد إلا هو، هو ربنا، عشان هو اللى خالقنا، وهو اللى متكفل بينا.. ربنا.. ربنا.
هو: قوليلى ياأمى، إنتى بِتصرِفى على نفسك منين؟
- هه!
هو: بتصرفى على نفسك منين؟
- باصرف على نفسى منين!!.. بأخذ عشرة جنيه من الجامع ... عشرة جنيه من الجامع.. وفيه حِتَّه لى فى مصر 40 متر، 40 متر باخد منها خمسين جنيه.
هو: بس!؟
- بس.
هو: وبتاكلى إزاى وبتشربى إزاى وبتتعالجى إزاى؟
- أنا والحمد لله، اللهم لك ألف حمد.. اللهم لك ألف حمد.. ده حِلوين أوى، هوا يعنى، يعنى ضرورى.. ضرورى ألِم! ضرورى ألم!.. عليه الصلاة والسلام الرسول.. الرسول ماكانش.. ماكانش بيـ .. كان قنوع.. ده اللى بيلِمُّوا فى مصارينهم اللى بيلموا دول وحشين، يِئضُّونى.. الستين جينه يئضونى ويفيض منى كمان..الحمد لله. اللهم ألف حمد.. ده حِلو أوى.. إيه ده.. ده كويِّس أوى.. ده حلو أوى..اللهم لك ألف حمد..( تقبل يدها ظاهرا وباطنا ).الحمد لله ..الحمد لله.
هو: طب إنتى ياأمى مش ناقصك حاجة أقدر أعملها لك؟؟
- إنشالله يباركلك، يباركلك ويكفيك شر الحاجات الوحشه إنت واللى زيَّك يابن حوا وآدم..الحمد لله، اللهم لك ألف حمد ياحبيبى، اللهم لك ألف حمد، اللهم لك ألف حمد..
هو: طب مش ناقصك حاجة ياأمى؟
- والله ياابنى الحمد لله.. اللهم لك ألف حمد.. اللهم لك ألف حمد، أحمده وأشكر فضله.
هو: قوليلى يا أمى، الرضا اللى انتى فيه ده جالك إزاى؟
- أحمد ربى واشكر فضله، إنشالله متتحِوِجْش أبدًا ولا تحتاجش ياابن حوا وآدم.
هو: مش عايزة حاجة خالص؟
- سلامتك، عاوزة سلامتك أنت واللى زيَّك و.. والجِدعان كلها تِسلم من كل حاجة وِحشة.
هو: إدعي لينا يا أمى والنبى.
- بادعي لكم والله.. والله، ينصركم على مين يعاديكم.. ينصركم على مين يعاديكم، ينصرك ياسيدنا محمد على الكفار.. ينصرك على اليهود ياسيدنا محمد.. ينصرك على اليهود وعلى الكفار.. ينصر دين الإسلام على اليهود والكفار يارب .. يارب يارب.
هو: ربنا يديكى الصحة ياأمى. انتهى
(وإن شئت أن تستزيد من الخير فشاهد ذلك اللقاء على هذا الفيديو على اليوتيوب بعنوان: وفاة أم إبراهيم رمز الرضا والصبر).


.......................[ندعوك للتسجيل في المنتدى أو التعريف بنفسك لمعاينة هذا الرابط]

اخواني في الله ارجوا من كل من يشاهد هذا الموضوع قرائه الفاتحه لروحها الطاهره