اللقمة تزيح النقمة

.

لما كنت عايشة مع جدتي ايام كتير كان يمر علينا ظروف صعبة
ان مافيش فلوس مثلا خالي مبعتلناش الشهر ده عادي زي كل البيوت بيجي وقت مافيش
مكنتش اعرف هي بتتصرف ازاي ...طبعا ولا عندي فكرة
بس في يوم فاكراه كويس قوي
كان كيس فلوسها اتسرق في السوق باللي فيه ومكانش في البيت كله غير 5 جنيه
بصراحة وهي بتبص في الدولاب عنيها دمعت لدقيقة كده وبعدين
عملت حاجة كانت هتجنني
قالتلي انزلي اشتري ربع كيلو عدس وعشر بيضات
نزلت وانا فاكرة ان ده اكل لينا
بس هي اخدت العدس طبخته وعملته حلو قوي ريحة الزبدة كانت طالعة منه وسلقت البيض وحطت معاه ورقة فيها ملح وفلفل وسخنت كام رغيف كانو عندنا
وخدت ده كله ونزلت الشارع ادته لجماعة غلابة
كنت هتجنن واقلولها طب كنتي سيبيلي بيضة
انتي مش بتحبيني
قالتلي اصبري شوية
وخدتني وطلعنا البيت كنا وقت قبل العصر نمنا شوية وصحينا علي خبط جامد علي الباب واحد صاحب خالي رجع من السفر وجايبلنا معاه فلوس وحاجات كتير حلوة
عشر دقايق عدو كمان والباب خبط تاني
عيل من اللي بيقعدو في السوق قالها ان كيس الفلوس بتاعها وقع قدامه ومكانش يعرف بيتها
يومها جدتي قالتلي اللقمة تزيح النقمة
كل ما تضيق بيكي وتلقي روحك محنوقة اطعمي فقير ولا محروم
طيب اشمعني العدس ياستي
العدس ربنا ذكره في القرأن للي ما شبعوش من اكل الجنة
وكمان انااما احطه للناس عشان انا اما احبه
قدمي للناس من اللقمة اللي تحبيها قوم ربنا يحلي زادك ويفك كربك
جدتي في الشتا كانت بتسلق بيض وتوزعه سخن علي عساكر المرور اللي بيقفو في الشارع والراجل اللي بيكنس

والله ما شفت متعة اكتر من اني اعمل اكل بإيدي واقدمه لحد
جربوها وانتو مخنوقين وهتتفاجئو من النتيجة

....................