إله الكون سامحني أنا حيران

إله الكون سامحني أنا حيران
جلال الخوف يقربني من الغفران
وسحر الكون يشاورلي على الحرمان
وانا إنسان يا ربي أنا إنسان
-----...
قابلت خدود صفا لونهم بلون الفجر في أدانه
وفيهم لون خجل يفتن ربيع الورد في أوانه
لقيت الفتنة ح تصادف كيان عايش بوجدانه
وخفت الشوق يسهيني يلاقى في قلبي أوطانه
رجعت لوحدتي أشكي ضنى قلبي وحرمانه
لقيتني في روضة بتغني نغم ألوان
جمال الورد فكرني على الأغصـان
بلون الخـد وحـرمني من النسيـان
يا خالق الورد سامحني أنا إنسان
-----
وشفت عيون بتسألني سؤال احترت في جوابه
على رمش الهوى كلمة حروفها قلبي وشبـابه
جريت منهم ومن روحي .. ومن قلبي وأحبابه
لحد الليل ما قابلني وقلت ادارى بسحـابه
وانام وانسى هوى الدنيا واسيب العشق لاصحابه
لقيت فكري صحي منى وانا نعســان
على عيون جت تكلمني عن الحرمان
أتارى الصبر غافلنى وكان عطشــان
يا خــالق الصبـر ارحمني أنا إنســان
-----
إله الكـون انا عـــاشق جمــال الخـلق والقـــدرة
باشوفهم فى الجبال قوة وفى عيون الأمل نظرة
واشوفهم فى الفضا عزة
وفوق خد الهوى شعــرة
وليا عيون إذا شافت تحب تشوف كمان مرة
وذنبى فى الهوى قلبي يحب يعيش ولو بكرة
إله الكون سامحني أنا حيران
جلال الخوف يقربني من الغفران
وسحر الكون يشاورلي على الحرمان
وانا إنسان يا ربي أنا إنسان

.....